സംഗതികള്‍!?

അവള്‍ പഠിക്കാന്‍ മിടുക്കിയായിരുന്നു. സംഗീതത്തിലും നൃത്തത്തിലും ദൈവം കനിഞ്ഞുനല്‍കിയ കഴിവുകളുണ്ടായിരുന്നു. സ്കൂളിലും കോളേജിലും മികച്ചവിജയത്തോടൊപ്പം കലാതിലകവുമായി. സംഗീതത്തിനും നൃത്തത്തിനും അവള്‍ക്ക്‌ കിട്ടാവുന്നതിലേറ്റവും നല്ല അദ്ധ്യാപകരെവച്ച്‌ പ്രത്യേകം പ്രത്യേകം പരിശീലനം കൊടുത്തിരുന്നു. ചാനലിലെ സംഗീതമല്‍സരത്തില്‍ ഒന്നാമതെത്തുമെന്ന് അദ്ധ്യാപകര്‍ക്കൊപ്പം ഞങ്ങള്‍ക്കും ഉറച്ച വിശ്വാസമുണ്ടായിരുന്നു. അതുകൊണ്ടായിരുന്നല്ലോ വിദേശത്തെ നല്ല ജോലി ഒഴിവാക്കിയതും നാട്ടിന്‍പുറത്തെ വീടും സ്ഥലവും വിറ്റ്‌ മല്‍സരം നടക്കുന്ന നഗരത്തിലെ കൊച്ചുവാടകവീട്ടിലേക്ക്‌ താമസം മാറിയതും.
എല്ലാവരുടേയും പ്രതീക്ഷതെറ്റിക്കാത്ത പ്രകടനമായിരുന്നു, എല്ലാ റൗണ്ടിലും. ഒരിക്കലും അവളുടെ താളം പിഴച്ചില്ല.. ശ്രുതിയും തെറ്റിയില്ല... വിധികര്‍ത്താക്കള്‍ക്കും മറിച്ചൊരഭിപ്രായമില്ലായിരുന്നു. പതിനായിരങ്ങള്‍ കൊടുത്തുവാങ്ങിയ അവളുടെ വസ്ത്രാലങ്കാരങ്ങളും ചമയങ്ങളും സുന്ദരമായിരുന്നെന്ന് എല്ലാവരും പുകഴ്ത്തി. പാടിയ എല്ലാഗാനങ്ങള്‍ക്കുമൊപ്പം മനോഹരമായി നൃത്തം ചെയ്തത്‌ വിധികര്‍ത്താക്കള്‍ മുക്തകണ്ഠം പ്രശംസിച്ചു.
എസ്സെമ്മെസ്സിനുവേണ്ടി എല്ലാവരുടെയും കരഞ്ഞു കാലുപിടിച്ചു...
എന്നിട്ടും അന്തിമവിധിവന്നപ്പോള്‍...?
അവള്‍ പുറത്തായി...!
കാരണം....?

സംഗതികളില്ലായിരുന്നു!